Tinxaka ta Maendli: Xitsonga Grammar
Maendli yini
Maendli i marito lama hi byelaka leswi endlekaka kumbe leswi humelelaka. Maendli ya hi komba leswaku nhlokomhaka yi endla swin’wana kumbe xiendliwa xi endleriwa swin’wana. Maendli a ya swi koti ku tirha ya ri woxe, ya tirha na switwananisi, swipfuneti kumbe ni swihluvi swin’wana swa mbulavulo.
Tinxaka ta maendli
Kuna tinxaka to hambanahambana ta maendli, tinxaka leti ti avanyisiwile hi nhlayo ya mapeletwana lama kumekaka eka riendli rin’wana na rin’wana.tinxaka ta kona hi leti landzelaka:
- Maendli lama nga na peletwana rin’we Xikombiso: -dya; -twa; -wa ; -fa na man’wana.
- Maendli lama nga na mapeletwana mabbirhi
Xikombiso: -tirha; -sweka; -yiva;; – huhwa; -hlamba na man’wana.
- Maendli lama nga na mapeletwana manyingi. Lama I maendli lama nga na mapeletwana manharhu kumbe ku tlula.
Xikombiso: -tsutsuma; -yimbelela; -vulavula, -hangunuxa na man’wana.
Marhavi ya maendli
Eka giredi ya le hansi mi dyondzile hi maendli, mi tlhela mi dyondza hi marhavi ya maendli, kutani sweswi mi ta endla mpfuxeto hi marhavi ya maendli.
Tinxaka ta marhavi ya maendli
Rhavi ra Xikongomelo
Rhavi leri ri komba leswaku nchumu lowu endliwaka wu ni xikongomelo Rhavi leri ri tihlawulekisa hi xilandzi -el-. Xik: tirhela, tsalela
Rhavi ra Xitwisiwo
Rhavi leri ri komba leswaku nchumu wun’wana wu xangeriwa swin’wana. Rhavi leri ri vonaka hi xilandzi -iw-. Xik: rhumiwa; lumiwa
Rhavi ra Xihlamulano
Rhavi leri ri hi komba leswaku minchumu mimbirhi kumbe yo tala yi tirha ntirho wun’we hi ndlela yo tlheriselana.
Rhavi leri ri vonaka hi xilandzi -an-/-anan-. Xik: hlevana; banana
Rhavi ra xivangelo
Rhavi leri ri komba leswaku nhlokomhaka yi boha xiendliwa ku endla swin’wana. Rhavi leri ri tihlawulekisa hi xilandzi -is-. Xik: rhwarisa; ambarisa.
Rhavi leri nkarhi wun’wana ri nga tirha hi ndlela leyi: ambexa; pfuxa
Rhavi ra Xidzimelo
Rhavi leri ri komba leswaku mhaka yi endliwa hi ku hetiseka.
Rhavi leri ri vumbiwa hi ku tirhisa xilandzi -isis-. Xik: hetisisa; vonisisa
Rhavi ra Xivuyevuye
Rhavi leri ri komba leswaku mhaka yi endliwa ko tala.
Rhavi leri ri tirhisa xilandzi -etel-. Xik: tirhetela; khometela.
- Rhavi ra Ntsongahato
Rhavi leri ri komba leswaku leswi endliwaka swi endliwa hi vuntsongo
Rhavi leri ri vumbiwa hi ku tirhisa xilandzi xa ntsongahato -nyana. Xik: dyananyana; tsalanyana
Rhavi ra Xitlhandlulo
Rhavi leri ri komba leswaku mhaka yi tlheriseriwa lomu yi humaka kona. Rhavi leri ri tirhisa xilandzi -ulna -ulul-. Xik: tlhavula; simula
Rhavi ra Xikotelo /xiendleko
Rhavi leri ri komba leswaku mhaka ya endleka kumbe yi olovile ku yi tirha. Rhavi leri ri vumbiwa hi swilandzi -ek- na -akak-. Xik: tswaleka; rhumeka
Rhavi ra Xitlhelelo
Rhavi leri ri komba leswaku mhaka yi tlhelela eka muendli wa yona.
Rhavi leri ri vumbiwa hi ku tirhisa xirhangi xa xitlhelelo ti-. Xik: tirhandza; tivona
