Maanea ndi mini? Maanea ndi maṅwalwa a vhusiki a songo lapfaho u ya thambo zwi tshi itwa kana u ṱuṱuwedzwa nga zwe muthu a vhuya a ṱangana nazwo vhutshiloni. Kanzhi maanea a nga ḓadza masiaṱari mavhili u ya kha mararu.
Muṅwali u ṋetshedza mihumbulo i kha phara a tshi nyanyuwa kana u vhangulwa nga ṱhoho yo ṋetshedzwaho kana ye a nanga. Ndi henefho hune ra vhona phara iṅwe na iṅwe yo faredza muhumbulo muthihi, fhedzi hu na u lunzhedzana hu tikedzaho ṱhoho. Afha-ha ndi hune muṅwali a vhonadza vhusiki hawe ha vhuswikeleli ha nṱhesa nga u kona u nanga na u vhekanya maipfi u tshi itela vha ṱanganedzaho mafhungo. Ṅwana a nga ḓisikela ṱhoho a tshi vhangulwa kana a tshi vinyuswa nga zwifanyiso zwine a khou vhona kana nga nyolo. Afha ndi hone hune ra vhona vhusiki ha mugudi musi a tshi ṅwala mihumbulo i songo lavhelelwaho.
Vhagudi vha konaho u ṅwala maanea o lundwaho tshidele ndi vhane vha ṱana/vhonadza marangaphanḓa, mutumbu na magumo.
Tshivhumbeyo tsha maanea: The structure of the essay
Mathomo : Introduction
Kha mathomo a ri sokou thoma na u amba. Mafhungo a fanela u ṋea ludungela. Muvhali u fanela u pfa sia ḽe muṅwali a dzhia. Mathomo a fanela u kunga. Ha ngo fanela u lapfesa.
Mutumbu: Body
U tevhela mathomo, wone wo vhumbwa nga dziphara. Phara iṅwe na iṅwe i vha i na muhumbulo wayo. Hu fanela u vha na ndunzhendunzhe yavhuḓi kha dziphara. Hezwi
zwi a konwa na nga u shumisa maṱanganyi sa ngauralo, nga zwenezwo, sa izwi. A si zwavhuḓi u shumisa lushaka luthihi lwa mafhungotswititi. Hu fanela u shuma-vho mafhungombumbano na mafhungotserekano.Kha ri lavhelese zwine phara dza fanela u u vha zwone.
Dziphara: Paragraphs
Phara iṅwe na iṅwe i fanela u kuvhatedza muhumbulo muthihi. Zwi amba uri phara a i nga khethiwi zwi tshi bva kha tshivhalo tsha mitaladzi. Zwi ḓo bva kha u vhinwa ha mihumbulo. Mutaladzi wa u thoma ndi wone wo hwalaho muhumbulo muhulwane. Miṅwe yoṱhe i tatamudza wonoyu muhumbulo muhulwane. Iyi ndi mitaladzi ya u tika. Mutaladzi wa u fhedza u vhina phara dzoṱhe.
Magumo: Conclusion
Phara ya u fhedza i swolodela mihumbulo yoṱhe. Muṅwali u bvisa vhuḓipfi hawe nga ha ṱhoho. Muvhali u fanela u zwi pfa uri mafhungo a khou vhiniwa. Hu nga ḓi shumiswa maipfi a ngaho: Ndi tshi khunyeledza, ndi vhina ngauri na maṅwe.
